唔駛景鴻移民 紐西蘭招募10 000名移民

搵食唔易、樓價高到癲、北方專材湧入爭飯碗、本地政局紛亂……香港亂到咁，好多港燦都喊住話要移民，但講還講，冇乜人真係走得到。除左係「哪有錢你老X」之外，實情係冇國家肯收留。

 

但各位港燦唔駛氣餒住，歷來宜居指數No.1的紐西蘭，而家居然大開移民之門！

 

紐西蘭的南地大區(Southland)，位於紐西蘭南島的最南端。天然資源豐富、環境冇得輸，但係當地有一個特別難搞嘅問題，就是人口太少，而人口少係因為氣候太凍。呢度每年平均最高氣溫係攝氏14度，最低氣溫係5.5度，平均氣溫都只得10度左右。雖然天氣係凍咗啲，但呢度嘅風景優美、空氣清新、工作多、福利好，非常適合人類居住。

---

 

---

當地政府計劃，2025年前要留下至少1萬個新移民。原因係當地老年化問題嚴重，未來幾年仲有幾千人等住退休，食飯口多過打工手，咁搞落去真係坐食山崩，引入新移民係冇辦法之中嘅辦法。

 

為咗配合政府嘅大計，當地唔少公司已經聯同學校有晒plan，例如紐西蘭南部理工學院（Southern Institute of Technology）表示，到該學校讀書的國際留學生，讀完書之後政府會幫你搵埋工，期望你呢位「專材」留低生活。唔知駛唔駛住夠七年先有身份證呢？

 

講到住，當地嘅樓價格簡直超值，20~30萬紐幣（約100-150萬港紙）就可以買到一間非常豪華嘅house，渣車10分鐘就出到城。喺香港？100萬港紙你連深水埗劏房都買唔起啦。

 

講埋環境，南地大區係紐西蘭乃至全世界受污染最小嘅區域，自然環境冇經過人為破壞(可能係某國人少去吧？)，仲有，呢個區嘅海豚、企鵝同海豹仲多過人類，唔駛畀錢都可以日日去海洋公園咁，係咪爽皮先？

 

講到咁吸引，點樣申請？快手click入去呢個網頁睇睇：www.sords.co.nz  (無錯，係英文。移民得紐西蘭緊係要識英文啦！)

---

 

相關報道全文：Migrants, please come south

http://i.stuff.co.nz/business/industries/92938680/migrants-please-head-south